's Voglheisl

So a schäs Vogöheisl! I ha ma owa a recht a Miah geb'n. Vierstecke, mit Balkenlager und an echtn Reambodn e jeda Ettage. Wann i scha a Vogöheisl moch, han i ma denkt, dann a gscheits. Net a so a Ollawödsheisl, wia's e de Siedlungen stengand. Na na, so a Reihenvoglheisl kimmt mia net en Goatn. Damit de Sach ebbs wiad, ha i ma vaneh a CAD-Programm kafft, 3D natürlich, damit es scho am Büdschirm richte seg und mit da Maus umananddrah ka. Hät i mia denkt, owa so oafach is des net ganga. Des bluats Programm hat ma en Schwitz aaf's Hirn trim und es is nu koa Strich vom Vogöheisl zan segn gwen. Owa  des wiad scho. Wann i scho dreizeahundad Euro fia des Programm ausgib, oft kimmt's aaf den Kurs e da IHK a nimma zam und ha me a'gmöd. Hoamle ha e ghofft, dass i des Programm scho nu fia ebbs andas hernema ka und net ois auf de Herstellungskostn von Vogöheisl umlegn muaß. Nach a Woche e da IHK is ma sche langsam kemma, dass des a längane Gschicht wiad. Wei, do ha i owei nu koan oazen Strich mocha kinna, der zu an Vogöheisl passt hätt. Hänge hoit an de vier Wochan nu amoi viere dra. Ho e nu an Urlaub guatschriebn und wegn de Kostn dua e me net oi. Foahrn ma hoit heia net aaf Griechenland, des muaß i owa meina Frau nu beibringa. Owa zerscht wiad 's Vogöheisl fertig gmacht.

Mit dem Programm is oft do bessa word'n und i ho ma ois Abschlussprüfung mei Vogöheisl via gnumma. Weil da Büdschirm recht schmoi war, ha i des Heisl net so broad plana kinna, wia e mögn hett. Eigentle ha i ja so an Toskanastil en Sinn ghobt. Owa dann ha i en Fernseha so an Reportage iwa Hongkong gsegn und denk ma, dass so a Woiknkratza a net schlecht war. Freile net ganz so hoigeigad, sunst kimm e o ban Fuadan nimma affe. Nach drei Monat is de Planung en d'Endphase ganga. Vorsichtshoiwa ho i en da Gmeinde agfragt, ob i a Genehmigung brauch. Wia de den Plan gsegn ham, ham's me a wen gspoase agschaut und gmoant, dass des ohne Genehmigung gang, owa an Statiker ham's ma empfoin, damit's d'Vegö net daschlogt. Nachdem da Sattelzug des Baumaterial abgladn hat, hab i en da Werkstatt statt dem Fenstal, wo i de längan Bredl sunst owei eigschobn hab a Sektionaldor braucht, damit der Stapler eifoahn hat kinna. Mia is des zwar a wen södsam via kemma, owa es wird scho sei Richtigkeit hobn. So a Programm mocht koan Fehla, hob owa dann trotzdem de Materiallistn amoi genaua agschaut, de vo dem Programm automatisch aufgstöt wordn ist. Da foit mia gleich de achtmetrign Leimbinda es Augn. Sapparawoid, wo kernd den de hi? Und schau glei es Programm. Da ka ma e da Materiallistn aaf a Position draaf klicka und dann wird des Trum e da 3D-Grafik grea. Pfeigrod ist hiazt üwa an jedn Guggal a greana Baikn. Oha! Wie gibt's hiazt des? Da Kursleita hot mia sei Visitnkoatn mitgebn und i deafad jedazeit aruafa, wanns ebs gab. Via Leimbinda mit acht Meta hand Grund gmua, han i ma denkt und ruaf a. Was i fia an Maßstab eigebn ha, frogt er mi. Ja iwahapt koan, sog i, es wiad o nedda a Vogöheisl. Dann kamad da Standardmaßstab zum Einsatz und i soid amoi rechts en da Eigenschaftsleistn schau. 1:50 les e. „Dann brauchst fia dei Voglheisl a gressas Gardl“ moant a und hängt lochad ei.

„De brauch ma sicha amoi!“ Ha i meina Frau erklärt, wia e de Leimbinda mit ihr e d' Garasch eingraumt ho, bis dorthi loss ma hoit 's Auto heraust und ob des Dor hiazt offn oda zua is, ba uns stüt eh neamd. Mit dem Maßstab 1:1 ho i dann a neie Materiallistn ausdruckt und bi wieda en's Baug’schäfft. De hamd me dann zum Baumarkt weidagschickt, wei's so an gloan Zeig ned do hamd. Des Heisl ist dann relativ schnö fertig wordn. Rode Wänd mit Vollwärmeschutz, weiße Fenstersteck, Innenwänd mit Dampfsperre, kontrollierte Wohnraumlüftung. Wenn scha, dann gscheit. Da richtige Standort war nu a Problem, owa da ho i mir a Laser-Nivelliergerät kaaft und vo an jedn Fensta aus den Gartn vamessn. Dazu ho i mia sechzg Fluchtstäbe bstöt und jedn Medda oan gsetzt. Dann bin i vo Fensta zu Fensta und ho jedn Fluchtstab, den i gsegn ho an Punkt gebn. So bin i aaf den optimalen Standort kemma. A Fundament war glei betoniert, weil owa des Betonauto unter drei Kubikmeta net herfoahrt, ha i den Zugang zum Vogöheisl a gleich mitbetaniert. Damit d'Katz net drakimmt, muaß des Heisl a wenig e d' Heh! Schneid e oiso von an Leimbinda drei Meta owa und zoag's stoiz da Frau, dass scho ageht mit'n Einsatz vo de Leimbinda. Links und rechts hob i von den sechzehner Gwindstangen aus da Erstbestellung nu Sprossn dragschauft und dann kimmt der Höhepunkt und da Autokran hebt des Vogöheisl aaf sein Standort. Ganz andächtig bin i a Stund davorgstandn und ha aaf de Vegö gwart. Scho noch a Viertlstund war fast oana gkemma. Owa dann draht er o und fliagt zum Nachbarn umme, der a a Vogöheisl hot. Owa hoit a oids, ofinigs, windschiafs Bredaheisl mit an varrostn Blechdoch. Des wiad scho da richte Vogl gwen sa. So a alternativa, mit lange Zotn, so a Vogö mit an Vogö. Den brauch ja i gar net. Fia an söchan het i den Aufwand ned betriebn. Wart i hoit, so a Neibau, der muaß se erst ummaredn. Owa nix is kemma. Rundumadum hams de Vogöheisl laargfressn und bei mir hot des deia Fuada zan Schimmön agfangt. Findns es hoit net, denk i ma und installier a Flutlichtanlag mit vier Scheinwerfer, a zwoatausnd Watt. Ban erstn Moi eischoitn is da Moasnknedl glei ausgrunna. Brauch eh koane Moasn, glangt o, wenn de andan olle kemmand und wann's amoi offiziell is, dann kann i o des Flutliacht wieda ausschoitn. Owa es war wia varreckt. Koa oaziga Vogö fliagt zu mein Heisl.

Na wart's es Hundsvegö, es miserablign. En Dachbodn obn ho i a oids Flobert. Und vo dort aus hat ma de umliegenden Vogöheisl einwandfrei en Visier. Damit de Gschicht endle amoi e de richtige Richtung geht, muaß a Radikallösung her und de alternativn Vogödeifön ghern verraumt, damit des Revier fir gscheide Vegö frei wird. Ob da meine achthundert Schuss klangand? I bi ja aus da Übung, da trifft net jede Kugö. Geh i oiso ins Waffngschäft und bstöh fünftausnd Schuss. De hät er net do, moant da Vakeifa und i soid mei Adress da lassn, dann liefern 's es. Des is a Service, denk i ma und geh zfriedn hoam. Wia i en unsa Gossn eibiag, fungezt ois blau und mei Heisl is komplett beleicht. Öha! Denk i mia. Is heit a Übung? Wia scho durchkinna und mecht zu da Hausdia. Davor liegand vier Feiwehra mit Gwehra und zünd aaf mei Hausdia. „Des hädns ma fei scho vorher sogn kinna!“ und weil me des Blauliacht und de Scheinwerfer a so blendnd, haschpöde iwa oan Feiweahra driwa und foi aaf den zwoatn draaf. Hiazt fangand de zan Schoißn a. Ja hand de komplett narresch. Zan Schluss treffans mei Vogöheisl a nu. Dawei i schau hams ma d'Händ am Bugö zambundn und werfand me en an Kombi und dahi geht's. I hob dann mildernde Umständ kriagt und a Bewehrung und da Nachbar is mei Bewehrungshelfer und kimmt alle Woche. Er hat mir a Vogöheisl gmacht. So a kloans. Grad so ofine, wia des sei. Owa unsane narreschn Vegö megns.